शाळा व महाविद्यालयीन स्तरावर ज्युनियर/युथ रेडक्रॉसची स्थापना करण्यात येते. ज्युनियर/युथ रेडक्रॉस उपक्रमाचा समावेश आता शाळा व महाविद्यालयांच्या शैक्षणिक समाजसेवा उपक्रमात करण्यात आला आहे. युवा रेडक्रॉसची स्थापना करण्यामागची प्राथमिक उद्दिष्टे म्हणजे, तरुणांमध्ये आरोग्य आणि नागरी जबाबदारीची जाणीव निर्माण करणे, मानवतावादी सेवेला प्रोत्साहन देणे, त्यांच्यात कर्तव्य आणि करुणेची भावना निर्माण करणे, आंतरराष्ट्रीय मैत्रीला प्रोत्साहन देणे. ज्यामुळे समाजाचे सक्रीय व जबाबदार सदस्य बनण्यासाठी ते तयार होतील. याशिवाय, विविध जागरूकता कार्यक्रम आणि उपक्रमांद्वारे ज्युनिअर/युथ रेडक्रॉस तरुणांना स्वतःचे आरोग्य व इतरांचे कल्याण समजून घेण्यासाठी आणि समुदायांमध्ये सक्रियपणे सहभागी होण्यासाठी व समाजाच्या कल्याणात योगदान देण्यासाठी प्रोत्साहित करते. तरुणांमध्ये आरोग्य व स्वच्छतेचा प्रचार, मानवतावादी मूल्यांचे महत्त्व, कोणत्याही पार्श्वभूमीची पर्वा न करता गरजू लोकांबद्दल करूणा आणि सहानुभूतीने वागण्याला व सामुदायिक सेवेला प्रोत्साहन देण्याचे कार्य ज्युनियर/युथ रेडक्रॉस मार्फत केले जाते. तसेच, आपत्ती तयारी प्रशिक्षण, प्रथमोपचार आणि सामुदायिक पोहोच कार्यक्रम यांसारख्या व्यावहारिक सेवा उपक्रमांमध्ये सहभागी होण्याची संधी ज्युनियर/युथ रेडक्रॉस प्रदान करते आणि तरुणांना रेडक्रॉस चळवळीच्या मुलभूत तत्वांबद्दल शिक्षित करते. आजपर्यंत रेडक्रॉस जिल्हा शाखेमार्फत अनेक गावांमधील शाळा व महविद्यालयांमध्ये ज्युनिअर/युथ रेडक्रॉस शाखा सुरु केलेल्या असून आणखीही काही शाळा व महाविद्यालयांमध्ये अश्या शाखा लवकरच सुरु करण्यात येणार आहेत.
